Қазақстан бақытты елдер рейтингінде бес сатыға жоғарылап, 40-орынға жайғасты. Ал ТМД бойынша елдер арасында бірінші орынға шықты, деп хабарлайды World Happiness Report сайты.

Бақытты елдердің рейтингі 2019-2021 жылдары жүргізілген сауалнама негізінде жасалған. Сауалнамаға әлем бойынша 9 миллионнан астам адам қатысқан.

Ең бақыты елдердің көшін әдеттегідей Финляндия бастап тұр. Үздік ондыққа Дания, Исландия, Швейцария, Нидерланд, Люксембург, Швеция, Норвегия, Израиль және Жаңа Зеландия енді.

Қазақстан бір жылдың ішінде бес сатыға көтеріліп, 40-орынға шықты. Осылайша ТМД аумағында ең бақытты ел болып танылды.

Былтырғы рейтинг қорытындысы бойынша Қазақстанның алдына шыққан Өзбекстан осы жолы 53-орынға тұрақтады. Молдова – 62, Қырғызстан – 64, Беларусь – 65, Ресей – 80, Армения – 82, Тәжікстан – 83, ал Әзербайжан 92-ші орынға жайғасты.