Қазір 15 облыста жайылымдық жер тапшы. Жеке қосалқы шаруашылықтардың малын жаю үшін қосымша 8,9 миллион гектар жер қажет. Бұл туралы Ауыл шаруашылығы министрі Ербол Қарашөкеев айтты.

Министрлік қайтарылған жерлердің интерактивті картасын әзірлеген. Сол арқылы халық өзі тұратын аумақ бойынша (әсіресе Түркістан, Қызылорда, Алматы және Атырау облыстарында) қайтарылған жерлер туралы ақпарат ала алады.

Ал Үкімет басшысы жайылым жерлерді ауылдың сырт жағына көшіріп, отарлық мал шаруашылығын дамыту керек екенін айтты. Сол себепті, мемлекет меншігіне қайтарылған жерлерді қоғамдық пайдалануға немесе жеке қосалқы шаруашылық кооперативтеріне бөліп беру қажет.

Қолданыстағы заң бұған мүмкіндік береді. Сонымен қатар, елді мекендердің маңында жайылымдық жерлердің аз болуы жеке қолдағы мал басының өсуіне шектеу қойып отыр. Сондықтан жайылымдарды тиімді пайдалану үшін жағдай жасау қажет. Қажет болса, жер қорынан учаскелер беру керек. Шалғайдағы жерлерді сумен қамтамасыз ету мәселесін жергілікті бюджеттердің мүмкіндіктерін пайдалана отырып шешкен жөн, - деді Әлихан Смайылов.

Жеке меншіктегі миллиондаған гектар жер пайдалануға келмейді. Өйткені 100 мың гектарлап алғандардың немқұрайлылығы салдарынан жердің 30 пайызы іске жарамсыз болып қалған. Яғни эрозияға ұшыраған.

Эрозияға ұшыраудың алдында тұрған жер де өте көп. Енді мемлекет меншігіне қайтарылған жерді қалай жандандыруды министрлік пен әкімдер ойластырады.