Солтүстік Қазақстан облысында эпидемиологиялық маусым басталғалы 30 мыңға жуық адам жедел респираторлы вирустық инфекцияға, 269 адам тұмауға шалдыққан.

СҚО санитариялық-эпидемиологиялық бақылау департаментінің басшысы Әсет Жұматаевтың айтуынша, 1 қазан – жаңа эпидемиологиялық маусым басталғалы өңірде 29 581 адам ЖРВИ жұқтырған. Былтыр 18 мыңға жуық адам ауырған. Сондай-ақ биыл ауырғандардың 65 пайызы – 14 жасқа дейінгі бала.

14 қазаннан бері өңірде тұмау жұқтырудың 269 жағдайы тіркелді. Былтыр небәрі 35 адам ауырған еді. Биылғы 20 жағдай «доңыз тұмауына» қатысты. 4 адамға H3N2, яғни «гонконг тұмауы» диагнозы қойылды. Ауырғандардың 52-сі – жүкті әйел, 84-і – 14 жасқа дейінгі бала, – деді Әсет Жұматаев.

Бұл ретте тұмауды жұқтырғандардың басым бөлігі – Петропавл қаласының тұрғындары.

Эпидемиологиялық маусым басталғалы 16 қаңтарға дейін стационарларда ЖРВИ-мен 748 адам жатып, ем алып шықты. Олардың 96-сы – жүкті әйел, 599-ы – бала. Жалпы ауырғандардың 65 пайызы – балалар. Коронавирус инфекциясы кезінде мектептерде балалар қашықтан білім алды, балабақшалар жұмыс істеген жоқ. Салдарынан оларда тиісінше иммунитет қалыптаспады. Сондықтан қазір жиі ауыратын болған, – дейді СҚО денсаулық сақтау басқармасының басшысы Құмар Күсемісов.

Облыстың бас дәрігерінің айтуынша, стационарларда тұмаумен 10 адам жатты, тағы алтауы «доңыз тұмауынан» емделген.