Ақтөбеде Алматы ауданының сотталған бұрынғы әкімі Абат Көбеновке тағайындалған бас бостандығын айыру жазасы айыппұлға ауыстырылды, деп хабарлады «Диапазон» басылымы.

Үкім Ақтөбе облыстық сотының апелляциялық сатысында қайта қаралып, алаяқтықпен сотталған экс-әкімнің жазасын өзгертуге болады деген қорытынды шығарылған. Осылайша, қылмыстық істер жөніндегі алқа оған 3 жылға бас бостандығынан айыру жазасының орнына 13 миллион 839 мың теңге айыппұл салған.

Апелляциялық сотта ол жазаны жеңілдетуді және жәбірленушіге келтірілген залалды өтегенін, денсаулық жағдайын, сондай-ақ 3 бала тәрбиелеп отырғанын, қарт анасы барын ескеруді сұрады. Сот материалдарды, прокурордың қорытындысын қарап, жеңілдететін жағдайларды ескеріп, ұрланған мүліктің 10 есе мөлшерінде айыппұл түрінде жаза тағайындады, - делінген соттың баспасөз хабарламасында.

Сондай-ақ ол өмір бойы мемлекеттік органдарда қызмет атқару құқығынан айырылған.

Еске сала кетсек, Абат Көбенов былтыр ақпан-қыркүйек айлары аралығында Ақтөбе қаласы Алматы ауданының әкімі болған еді. Ал қалалық әкімдік аппаратының басшысы болып жүрген кезінде танысына жер телімін беріп, 1 миллион 383 мың теңге алғаны үшін сотталған.