Жамбыл облысының әкімі Нұржан Нұржігітов Сарысу ауданының Жаңатас қаласына барып, бораннан кейінгі жағдаймен танысты, деп хабарлады Halyq Uni тілшісі.

Өңір басшысы алдымен «ЖаңатасСуЖылу» МКК қалыпқа келтіру жұмыстарын тексерді. Сондай-ақ қатты желден құлаған электр бағандарын көріп, оларды жөндеу бойынша жауаптыларға тапсырмалар жүктеді.

Дінмұхаммед Қонаев атындағы орта мектепте болған облыс әкімі қаладағы 2-3 оқу ордасын жылытуға барынша көңіл бөлу керектігін баса айтты.

Ол үшін арнайы генераторлар пайдаланылады. Бұл мектептерді жылыту пунктері ретінде дайын тұруы маңызды, – деді өңір басшысы.

Сонымен бірге «Шахан» қосалқы станциясына барған Нұржан Нұржігітов қаланы ең алдымен электр энергиясына қосу керектігін жеткізді.

Қазір электр желілерін реттеу жұмыстарына 10 бригада жұмылдырылған. Әкім бұл жұмыстарды 2-3 сағатта аяқтауды тапсырды.