Оқу-ағарту министрі Асхат Аймағамбетов еліміздің барлық өңіріндегі балалар өкілдерімен кездесу өткізді, деп хабарлады Halyq Uni.

Асхат Аймағамбетов көшбасшы оқушыларды құттықтап, атқарылып жатқан жұмыстарды атап өтті.

Президент осы жылды Балалар жылы деп жариялады. Мемлекет балалардың жан-жақты дамуына және сапалы білім алуына жағдай жасап, балалардың қауіпсіздігі мен әрбір қазақстандық баланың әл-ауқатын қамтамасыз ету шараларын қабылдап жатыр. Ал сіздер достарыңызға балалардың құқықтарын түсіндіріп, оларды толғандыратын мәселелерді бізге жеткізіп, көмектесіп отырсыздар. Қазір біз балалардың құқықтары мен мүдделерін қорғау мақсатында бірқатар ірі жобаны жүзеге асырып жатырмыз, - деді министр.

Айтуынша, алғаш рет Балалардың әл-ауқаты индексі енгізіліп, мектептегі психологиялық қызметтердің қызметі қайта форматталып, буллингтің алдын алу шаралары қолға алынған. Сондай-ақ әлеуметтік мәселелер шешіліп жатыр. Әр облыста қазірдің өзінде ынтымақтастық орнатып жатқан балалар құқықтарын қорғау жөніндегі уәкілдер тағайындалды.

Министр мемлекеттің дарынды балаларға ғана емес, аз қамтылған отбасы балаларына да қолдау көрсетіп жатқанына тоқталды. Соның бір айғағы ретінде жақында дарынды балаларға арналған мамандандырылған білім беру ұйымдарына оқуға түсу үшін әлеуметтік осал топтағы балаларға гранттар бөлу туралы шешім қабылданғанын айтып өтті.

Мемлекет басшысының тапсырмасымен Балалар жылында алғаш рет беделді халықаралық пәндік олимпиадалардың жеңімпаздары қомақты ақшалай сыйлықтар мен қазақстандық жоғары оқу орындарына конкурсқа қатыспай грантқа оқуға түсуге мүмкіндік алды.