Премьер-министрдің орынбасары Серік Жұманғарин Екібастұз қаласындағы жылу-электр орталығынан бейнеконференция өткізді.

Ол ЖЭО-дағы апаттың себебін айтып, проблеманы шешу үшін 39 бригаданың жұмыс істеп жатқанын жеткізді. Сондай-ақ вице-премьер бүгіннен қалмай қаладағы 17 қабатты тұрғын үй мен Amanat партиясының ғимаратына жылу берілетінін айтты.

ЖЭО-ға келетін судың қысымы төмендеп, шығыны көбейіп кетті. Сол себепті, ЖЭО иелері мен әкімшілік шешім қабылдап, 149 көпқабатты үйді, 114 жеке үй мен 15 әлеуметтік ғимаратты жылумен жабдықтаудан уақытша ажыратты. Бұл немен байланысты? Біз екі тәулік бойы су кеткен жерді іздедік. Оның бір ерекшелігі бар, су жердің астынан сыртқа шықпайды. Кеше ғана су кетіп жатқан ең үлкен жер табылды. Қазіргі уақытта барлық жұмыс сол жерде жүріп жатыр. Ол үшін 39 бригада, оның ішінде 214 адам басқа қалалардан да жиналды. Бүгін түскі уақытта жылу Мәшһүр Жүсіп көшесіндегі 17 көпқабатты тұрғын үй мен Amanat партиясының ғимаратына қосылады.. Кешке дейін барлық көпқабатты үйлерге жылу беріледі, – деді Серік Жұманғарин.

27 қараша күні сағат 13:20 шамасында Екібастұз ЖЭО-да қазандық істен шығып, он минуттан кейін тағы үшеуі тоқтаған болатын. Осыдан кейін қаладағы балаларды қолдау орталығының тәрбиеленушілері Павлодарға ауыстырылып, мектеп оқушылары онлайн білім алуға көшірілді.