«Болашақ» бағдарламасы бойынша техникалық бағыттарға гранттар саны 60%-ға дейін өседі.

2022 жылы «Болашақ» бағдарламасы бойынша техникалық және IT мамандықтарға гранттар саны 36%-дан 60%-ға дейін өседі. Бұл оқытудың осы бағыттары бойынша үміткерлерді қолдаудың қосымша шараларының бірі, – дейді Білім және ғылым министрлігі.

Сонымен қатар техникалық дайындық бағыттары бойынша үміткерлер үшін шет тілін меңгеруге арналған IELTS тестінің орташа балы төмендетілді. Енді 5.0 балл жеткілікті және бір жыл тілдік дайындықтан өту мүмкіндігі де қарастырылған. Бұл шаралар техникалық мамандықтар бойынша оқыту мүмкіндігін кеңейтеді.

«БҒМ Президент Қасым-Жомарт Тоқаевтың тапсырмасы бойынша бағдарламаны қайта бағдарлау процесін бастады. Енді инженерлік-техникалық кадрларды дайындау басымдыққа ие болмақ. Сондай-ақ «Инженерлік-техникалық қызметкерлер» жеңілдетілген санатын енгізу қарастырылып жатыр. «Болашақ» бағдарламасына құжат тапсыру кезінде олар міндетті түрде шетелдік университеттерге өз бетінше түспейді. Олар алдымен тіл курстарынан өтіп, стипендия тағайындалғаннан кейін бағдарлама бойынша оқуға ұсынылған университеттер тізімінен оқу орнын таңдай алады», - деді «Халықаралық бағдарламалар орталығы» АҚ президенті Әнуар Жанғозин.

Сонымен бірге ауылдық жерлерден келген үміткерлердің де мүмкіндіктерін арттыру жоспарланып отыр. Мысалы, IELTS нәтижесімен ағылшын тілін меңгеру деңгейін 5.0 балға дейін төмендету, ауылдық жерлерде міндетті тұру мерзімі 3 жылдан 2 жылға дейін қысқарту жоспарда бар. Оларға тілдік дайындықтан өтуге мүмкіндік беріледі. Одан бөлек, аудандық маңызы бар қала тұрғындарын қосу арқылы ауылдық жерлерден кандидаттар контингентін кеңейту және олардың санын ұлғайту ұсынылды.

Сондай-ақ 23 техникалық шетелдік университетті үздік 250 халықаралық академиялық рейтингіне кіретін QS World University Rankings, Academic Ranking of World Universities, Times Higher Education World University Rankings және БРИКС елдерінің жетекші 20 ұлттық рейтингтеріне енгізу жұмыстары жүріп жатыр, – делінген ақпаратта.

Сонымен қатар кадрлар даярлау жөніндегі республикалық комиссия докторантураны бітірген стипендиаттарға, сондай-ақ әлемнің жетекші Fortune-500 компанияларында тағылымдамадан өту үшін стипендиаттарға бір жылдық мерзімді кейінге қалдыру туралы шешім қабылдады.

«Барлық процесті оңайлату, автоматтандыру және ашықтық бойынша жұмыс жалғасады. Академиялық адалдықты қамтамасыз ету үшін стипендия беруге конкурстық іріктеу прокторинг пен античитингтің жетілдірілген жүйесімен жүзеге асады. Онлайн формат және бизнес-процестерді одан әрі автоматтандыру іріктеу жүйесін одан да ашық, қолжетімді, ыңғайлы және ұтқыр етеді», – дейді ведомство.