Қаңтар оқиғасынан кейін қамауға алынған Арман Жұмагелдиев үндеу жасап, өзіне қатысты тергеудің әділ өткенін қалайтынын айтты.

Митингте қан төгілмеуіне жол бермеуге тырыстым. Елді бірлікке шақыруға күш салдым. Халқымды қорғағым келді. Қазір сол үшін қапаста отырмын. Арандатушылардың жолын кескім келді, сондықтан осылай жасадым, – дейді ол.

7 қаңтарда Алматыдағы арнайы операция барысында «Дикий» Арман (Жұмагелдиев – ред.) бастаған ұйымдасқан қылмыстық топтың 6 мүшесі ұсталған болатын. Қылмыскерлерден түрлі марка мен калибрлі 4 жартылай автоматты тапанша, оқ-дәрі, суық қару мен броньдалған көлік тәркіленген.

Айта кетейік, 6 қазанда Алматы ауданаралық соты тергеу өтінішін қарап, Арман Жұмагелдиевті қамау мерзімін 7 желтоқсанға дейін ұзартты.

Бас прокуратура мәліметінше, Арман Жұмагелдиев келесі баптар бойынша күдікті ретінде қамауға алынған:

• Қылмыстық кодекстің 287-бабы 4-бөлігі (Ататын қаруды, оқ-дәрілерді, жарылғыш заттарды немесе жарылғыш құрылғыларды адамдар тобының алдын ала сөз байласу бойынша немесе бірнеше рет заңсыз алу, беру, өткізу, сақтау, тасымалдау немесе алып жүру);
• Қылмыстық кодекстің 272-бабы (Жаппай тәртіпсіздіктерге қатысу, күш қолданумен, қиратумен, өртеумен, бұзумен, мүлiктi жоюмен, атыс қаруын, жарылғыш заттарды немесе жарылыс құрылғыларын қолданумен, сондай-ақ билік өкiлiне қарулы қарсылық көрсетумен ұласқан, оның ішінде шетелдік көздерден алынған қаражатты пайдалана отырып жаппай тәртiпсiздiктi ұйымдастыру);
• Қылмыстық кодекстің 126-бабы 3-бөлігі 3-тармағы (өмiрге немесе денсаулыққа қауiптi күш қолданып «Адамды бас бостандығынан заңсыз айыру»).