Ақтаудағы мектептердің бірінде оқу кабинеттерінің жоқтығынан мұғалімдер дәлізде жұмыс істеуге мәжбүр, деп хабарлады Halyq Uni тілшісі, Хабар 24-ке сілтеме жасап.

Мектеп 1600 орынға есептелген, бірақ онда 3,5 мыңға жуық бала үш ауысымда оқиды. Мектептің бірінші қабатындағы орынды мұғалімдер өздері үшін жабдықтап алған. Айтуларынша, кабинеттердің жоқтығынан мұғалімдер бөлмесін оқу сыныбы ретінде балаларға берген.

Бізде қазір мұғалімдер бөлмесі жоқ. Дәптерлерді дәлізде тексеруге мәжбүрміз. Әрине, мұның бәрі қиындықтар туғызады. Соған қарамастан жұмысымызды жалғастырамыз. Тіпті қосалқы бөлмелер мектептегі оқу кабинеттеріне берілді. Мысалы, қойма еңбек кабинеті болды. Ол жер тар, тақта жоқ, жылыту да әлсіз, – деді 11-сыныптың сынып жетекшісі Раушан Әбілова.

Мектеп басшылығының айтуынша, оқушылар мектепке жақын аудандардан да келеді.

Бізде көрші ауылдардың балалары да оқиды. Мысалы, олар Мұнайлы ауданынан келеді. Түпқараған ауданына қарасты Тельман, Ақшұқыр ауылдарынан мектеп оқушылары қатынап оқиды. Көрші шағын аудандардан 900-ге жуық бала келеді. Жүктеме өте үлкен, – деді мектеп директорының міндетін атқарушы Орынбасар Наурызбаев.

Аталмыш мектеп – бүкіл шағын аудандардағы жалғыз білім ошағы. Маңайдағы жаңа аудандарда әлі мектеп жоқ. Жалпы Маңғыстау облысында үш ауысымда оқытатын осындай 18 мекеме бар.

Онда 5 мыңнан астам бала үшінші ауысымда оқиды. Сондай-ақ 43-ші мектепте де оқушыларға 8 мыңнан аса орын тапшы. Бүгінде 20-дан аса мектептің құрылысы жоспарланған. Төрт мектептің құрылысы жүріп жатыр. Бұл – Мұнайлы ауданындағы мектептер мен Ақтау қаласындағы әрқайсысы 1200 орындық екі мектеп, – деді облыстық білім басқармасы басшысының орынбасары Гүлмира Мамаева.

Айта кететін жайт, өңірдегі екі мектеп апатты жағдайда тұр. Бірі Жаңаөзен қаласында, екіншісі Бейнеу ауданында орналасқан.