Ішкі істер органдары есірткі құралдары, психотроптық заттар мен прекурсорлардың заңды айналымындағы заң бұзушылықтарды анықтайтын «Дәрмек» республикалық жедел-алдын алу іс-шарасын өткізді. Операция барысында 320 шаруашылық жүргізуші субъект, оның ішінде 38 өнеркәсіптік кәсіпорын, 68 медициналық ұйым және 201 дәріхана тексерілді.

Есірткі құралдары, психотроптық заттармен жұмыс істеу тәртібін бұзу арқылы заңды айналым және улы заттардың заңсыз айналымы саласында 25 қылмыс тіркелді. Рейдтік іс-шараларды жүргізу кезінде 830 тоннадан астам прекурсорлар - есірткі өндірісінде ықтимал пайдаланылуы мүмкін зат және 3 кг улы зат (ртуть) алынды, – дейді ІІМ.

Мысалы, Атырау облысының бір өнеркәсіп ұйымы лицензиялау нормаларын бұза отырып, 338 тоннадан астам күкірт қышқылын сақтаған. Кінәлілер жауапқа тартылды.

Дәріханалық нашақорлық және өзге де құқық бұзушылықтың алдын алу мақсатында полиция есірткі айналымы саласында 175 әкімшілік заң бұзушылықты анықтады. Олар: 101 фармацевтикалық қызмет ережесін бұзу, 40 есірткі және прекурсорлар айналымы бар объектілерді техникалық нығайту нормалары, 16 заңсыз фармацевтикалық қызмет фактісі, 18 лицензиялау нормаларын бұзу.