Өтінімдер 2022 жылдың 1 қарашасынан бастап, бір ай бойы қабылданады
Алматы облысының әкімдігі мен «Отбасы банк» АҚ («Бәйтерек» холдингінің еншілес ұйымы) жаңа тұрғын үй бағдарламасын бастады.
Жоба 35 жасқа дейінгі облыс тұрғындарына пәтер сатып алу үшін жеңілдетілген несие алуға мүмкіндік береді.
«Отбасы банктің» Алматы облысы филиалының директоры Ғалымжан Шалғымбаевтың айтуынша, «Алатау жастары» бағдарламасының шарттары бойынша қатысушылардың Алматы облысындағы ресми жұмыс өтілі бір жылдан кем болмауы тиіс. Оны міндетті түрде зейнетақы жарналарының тұрақты түсімі көрсетілген құжатпен растау қажет.
Сондай-ақ өтініш берушінің Алматы облысында кемінде бір жылдық мерзімі бар тұрақты тіркеуі болуы керек. Тағы бір шарт – бағдарламаға қатысушының және оның отбасы мүшелерінің соңғы 5 жылда аттарына тіркелген жылжымайтын мүлік болмауы тиіс.
Алматы облысы әкімінің орынбасары Ләззат Тұрлашовтың айтуынша, облыс әкімдігі осындай бағдарламаларды бұрын іске асырған Алматы, Астана, Қарағанды, Жамбыл және Қостанай облыстарының оңтайлы тәжірибесін үлгі ретінде алды. Бірінші кезеңде облыс әкімдігі жаңа жобаға 600 млн теңге бөліп отыр. Ал Отбасы банк өз кезегінде бұл қаражатқа жеңілдетілген несие беруге көмектеседі. Осындай қолдаудың арқасында облыс тұрғындары биылдың өзінде алғашқы қоныс тойын тойлайтын болады.
«Отбасы банк» АҚ-тың мәліметіне қарағанда, бағдарламаға қатысуға өтінімдер 2022 жылдың 1 қарашасынан бастап, бір ай бойы қабылданады. Өтінімді облыс әкімдігінің Ішкі саясат басқармасына беру қажет.
Құжаттарды қабылдау аяқталғаннан кейін әкімдіктен арнайы құрылған комиссия жиналған ұпайлар бойынша іріктеу өткізеді. Оның барысында некеде болған жылдар саны, балаларының болуы, жұмыс тәжірибесі, мамандығы және қызмет саласы есепке алынады.
Содан кейін қатысушылардың тізімі жасалып, Отбасы банкіне жіберіледі. Қатысушылар банкте төлем қабілеттілігін бағалатып, өз бетімен баспана табады. Оны сатып алуға банк 10 млн теңге несие береді. Егер мүліктің құны 10 млн теңгеден асатын болса, үміткер айырмашылықты өз қаражаты есебінен төлей алады.
«Егер отбасы жаңа тұрғын үй (пайдалануға берілген болуы тиіс) сатып алса, онда алғашқы жарна 0% болады. Егер екінші нарықтан алынған баспана болса (пәтер немесе жеке үй), онда алғашқы жарна 10% болады.
Несие бойынша сыйақы мөлшерлемесі жылдық 5% тең (ЖТСМ 5,2%). Несиенің максималды мерзімі – 19 жыл», – делінген хабарламада.