×

Жамбыл облысындағы сапасыз жолдар үшін лауазымды 250 адам жауапқа тартылды

13 мың шақырымнан асатын автожолдарға тексеру жүргізілді

 Динара Амантай 11.10.2022 | 11:29
Фото: polisia.kz

Жамбыл облысында автомобиль жолдарын қанағаттанарлықсыз ұстағаны үшін 250 лауазымды азамат жауапқа тартылды деп хабарлады Halyq Uni тілшісі.

Полиция қызметкерлерінің мәліметінше, осы жылдың 9 айында жол қозғалысы қауіпсіздігін қамтамасыз ету мақсатында жол-техникалық инспекция қызметкерлері ұзындығы 13 мың шақырымнан асатын жалпыға ортақ пайдаланылатын автожолдарға 1782 тексеру жүргізген. Тексеру барысында облыстың автожолдарында 11602 ақау анықталды. Жол ұйымдарының басшыларына және жергілікті атқарушы органдарға анықталған кемшіліктерді жоюға 1782 нұсқама жіберілді.

Жамбыл облысы ПД Әкімшілік полиция басқармасының бастығы Жайдарбек Құттыбаев атап өткендей, автомобиль жолдарын қанағаттанарлықсыз күтіп ұстағаны және жол қозғалысы қауіпсіздігін қамтамасыз етпегені үшін 250 жоғары лауазым иесі әкімшілік жауапкершілікке тартылды.

Бұдан басқа Тұрар Рысқұлов және Шу аудандарының полиция бөлімі, сондай-ақ Тараз қаласы ПБ берген нұсқамаларды орындамағаны үшін ҚР ӘҚБтК 3-бөлімінің 462-бабына ауданның автожолдарын күтіп ұстауға жауапты лауазымды азаматтар әкімшілік жауапкершілікке тартылды.

Сонымен бірге өткен кезең ішінде автомобиль жолдарымен қиылысатын барлық 73 теміржол өткелдері тексеруден өтті. Тексеру барысында олардың құрамындағы 205 ақау анықталды. Өткелдерге қызмет көрсететін ұйымдардың басшыларына кемшіліктерді жою үшін 68 нұсқама берілді.

Теміржол өткелдерін қанағаттанарлықсыз ұстағаны және жол қозғалысы қауіпсіздігін қамтамасыз етпегені үшін 20 лауазымды адам әкімшілік жауапкершілікке тартылды.

Сонымен қатар, жергілікті атқарушы органдарға жол қозғалысын ұйымдастыруды жақсарту, яғни бағдаршамдарды орнату, жер үсті жаяу жүргіншілер өткелдерін, көлік айырбастарын, автотұрақтар мен кіреберістерді салу бойынша ұсыныстары бар ақпараттық хаттар жолданды.

Серіктес жаңалықтары

Сараптама